ಜಾಲತಾಣ (Internet)

           ಜಾಲತಾಣ (Internet)              

ತೆರೆದ ಜಗವು ಈ ಜಾಣ ಜಾಲತಾಣ,

ಅರಿತ-ನುರಿತವರ ಮೊಗಸಾಲೆ, ದಡ್ಡ

ಅಹಂಕಾರಿ-ದುರುಳರ ಪಡಸಾಲೆ, ನೀ

ಪೇಳ್ದಂತೆ, ನೀ ಕೇಳ್ದಂತೆ ಮಾರ್ದನಿಸುವ ಮೈದಾನವಿದು- ಅರಿಬೊಮ್ಮ

ವಿಷಯಂಗಳು ಜಗದಗಲ ವಿಸ್ತಾರ,

ದಾರಿ ತಪ್ಪಿಸುವ ಅತೀವ ಹುನ್ನಾರ,

ಸಕಲವೂ ಪುಟಿದೆದ್ದು, ಚಂಗನೆ ದಾರಿ

ತಪ್ಪಿಸಿ, ದಡ ಹತ್ತಿಸುವ, ಭ್ರಮೆಯಾವರಣ ಈ ಜಾಲತಾಣ- ಅರಿಬೊಮ್ಮ

ಮನೆ ಹಿರಿಯರು ಬೇಕೇ? ವಿಷಯ ತಿಳಿಸಲು,

ತಾನಿಲ್ಲವೇ ಸಕಲರಿಗೂ ಗುರುವು, ಕೇಳಿದಾಕ್ಷಣ,

ಕಣ್ಣು ರೆಪ್ಪೆ ಮುಚ್ಚುವುದರಲ್ಲಿ, ಬಾಲಕೃಷ್ಣನ

ಪುಟ್ಟ ಬಾಯಿಯಲ್ಲಿ ತೆರೆವ ಅನಂತವಿಶ್ವವಿದು ಜಾಲತಾಣ - ಅರಿಬೊಮ್ಮ

ಆಡುಗೆ, ನಡುಗೆ, ತೊಡುಗೆ, ನಮಗೆ, ನಿಮಗೆ

ಏನಿಲ್ಲ, ಏನುಂಟು, ಎಣಿಕೆಗೆ ಸಿಗದ ನಕ್ಷತ್ರಗಳು,

ಕೂಸು ಪಾಲಿಸುವುದೆಂತು, ಕೂತು ಉಣ್ಣುವುದೆಂತು,

ಮೈ ದಣಿಸುವುದೆಂತು, ಮನೆ ಕಟ್ಟುವುದೆಂತು, ಸಕಲಗ್ರಾಹಿ ಈ ಜಾಲತಾಣ – ಅರಿಬೊಮ್ಮ

ಅರಿತು ನಡೆದರೆ, ಸುಭದ್ರ ಮಾರ್ಗವು,ಆಭೇದ್ಯ ಗೋಡೆಯು

ಹಾದಿ ತಪ್ಪಿದರೆ, ಶಯನ ಕೋಣೆಯು ಅನ್ಯರಿಗೆ ತೆರೆದಿಹುದು,

ಅಣುಕಾಷ್ಟ ರೇಣು ವಿವರ, ಬೇಡದ ಪ್ರವರ, ಈ ಜಾಲತಾಣ, ನೀ

ಮುಚ್ಚಿಡುವುದ ಮುಚ್ಚಿಟ್ಟು, ತೋರಬಹುದಾದಷ್ಟೇ ತೋರಿ, ಧನ್ಯನಾಗು- ಅರಿಬೊಮ್ಮ

ನಿನ್ನಂದ ಚಂದವ ಅನ್ಯರಿಗೆ ತೋರುವ ಕನ್ನಡಿ,

ನಿನ್ನುತಿಯ ಕಹಳೆ ಊದುವ ಚಂದಗಾತಿ,

ತಂದೆ-ತಾಯಿ, ಗಂಡ-ಹೆಂಡತಿ-ಮಕ್ಕಳ ಹೊಗಳಿ, ಊರಿಗೆ

ತುತ್ತೂರಿಯೂದುವ, ಶತೃಗಳ ಜರೆಯುವ, ಬಹಿರಂಗ ಶೌಚಖಾನೆಯಿದು ಜಾಲತಾಣ -  ಅರಿಬೊಮ್ಮ

ಕಲಿಯದರೆ ಮುಕ್ತಿಯಿಲ್ಲ, ಕಲಿತರೆ ಕೊನೆಯಿಲ್ಲ,

ಕಲಿಸುವವರ, ಕಲಿವೀರರ, ಕುಲರಹಿತ, ಕಲಿಯುಗ ಲೋಕ,

ನಗುವ, ನಗಿಸುವ, ಅಳುವ, ಅಳಿಸುವ, ನೋವ ನುಂಗುವ,

ನಾಕ-ನರಕಗಳ ದರ್ಶನಂಗೈಯ್ಯುವ, ಮುಕ್ತಿಮಾರ್ಗವು ಈ ಜಾಲತಾಣ - ಅರಿಬೊಮ್ಮ

---ಡಾ. ಎಸ್.ಎನ್. ಶ್ರೀಧರ 

ವಚನ - ಪರಮಗುರು

ಗುರುವು ಹೇಗಿರಬೇಕೆಂಬ ಬಗ್ಗೆ ನನ್ನ ಚಿಂತನೆ

ಗುರುವೆಂಬುವನು ಬರಿಯ ಬೊಗಳೆ ಬೋಧಕನೇ,

ನುರಿತವರಿಂದ ಅರಿತು, ಅರಿತವರಿಂದ ಕಲಿತು,

ಕಲಿತುದ ಕಾರ್ಯಕ್ಕಿಳಿಸಿ, ಸರಿ ಸಾಧನೆ ಸಾಮಗೈದು,

ಪರಮಗುರುವೇರಿದ ಪದೋನ್ನತ ಪರ್ವತವ – ಅರಿಬೊಮ್ಮ

ಗ್ರಂಥಗಳೋದಿ ತಿಳಿವ, ಪಂಡಿತರೊಡನೆ ಚರ್ಚಿಪ,

ದೇಶ ಬಳಸಿ ಅರಿವ, ಗೆಳೆಯರಲಿ ಗಳಿಪ,

ಕಲಿಸುತ ಕಲಿವ, ಅಜ್ಞಾನಿಯಲೂ ಜ್ಞಾನವರಸುವ,

ಗುರುವು ತಾ ಕಾಣುವ ಗುರುವ ಸಕಲರಲಿ - ಅರಿಬೊಮ್ಮ

ಸೂಸಿರಲಿ ಸ್ನೇಹಗುಣ ಹೊನಲು ಮೆಲುನಗೆ ಹರಿಸಿ,

ಕಷ್ಟಕ್ಕೆ ಮರುಗಿ, ದುಷ್ಟಂಗೆ ತಿರುಗಿ, ಶಿಷ್ಟಂಗೆ ಚಪ್ಪರಿಸಿ,

ವಿಷಯ ಕಾಠಿಣ್ಯವ ಕೆಂದೆಳ್ನೀರ ಸಿಹಿಯಾಗಿಸೆ,

ಗುರುವೇ ಧನ್ಯ ತಾ ಉಪಾಧ್ಯಾಯನು ಶಿಷ್ಯ ಕೋಟಿಗೆ – ಅರಿಬೊಮ್ಮ

ವಿಷಯದ ತನಿ ಹಾಲನು ಕೆಂಪಗೆ ಕಾಸಿ,

ಹಾಲಿಗೆ ವಿಚಾರದ ಕಡು ಹೆಪ್ಪನೆ ಬೆರೆಸಿ,

ಮೊಸರ ಮಂಥನದಿಂದಲೇ ಜ್ಞಾನ ಬೆಣ್ಣೆಯ ಕಡೆಸಿ,

ಗುರುವೇ ಉಣಬಡಿಸೋ ಸುಜ್ಞಾನಾಘವ ಬೆಣ್ಣೆಯ ಕಾಸಿ – ಅರಿಬೊಮ್ಮ

ಇರಲಿ ನಿನ್ನ ಕೋಟಿ ಕೋಟಲೆ ಮನೆಯಂಗಳದಲ್ಲೇ,

ಸುವಿಚಾರ ಸಾರವೇ ತುಂಬಿ ತುಳುಕುತಿರೆ ಮನದಲ್ಲೇ,

ನಗುಮೊಗದಿ ಶಿಷ್ಯ ಸಮಸ್ತಗೆ ನೀ ವಿಷಯ ಬೆಸೆದಲ್ಲೇ

ಗುರುವೇ, ಸಗ್ಗ ಕಂಡರನುಯಾಯಿಗಳು ಪಾಠಶಾಲೆಯಲ್ಲೇ - ಅರಿಬೊಮ್ಮ